بدأت اسمعك من وانا في الجامعه تقريبا ولكن مش بشكل منتظم بس كلامك كان مختلف ومريح وتخرجت من الجامعه واشتغلت فتره في مكتب محاسبه مع والدى ولكن لم اجد نفسي واشتغلت بعدها في شركة اوراق ماليه في خدمة العملاء وتكرر نفس الشعور مش مكانى ومش مبسوطه وتزوجت بعدها وتفرغت للبيت وانجبت اول طفل ليا وبعدها حدثت لي صدمة عمري .. امي توفيت فجأه بدون سابق انذار فجأه بمعنى الكلمه في حضنى وقدام عنيا مفهمتش انها ماتت وقتها ومصدقتش الدكتور لما قال البقاء لله فضلت في صدمه وكل يوم كابوس انى امى بتموت فجأه ولكن بشكل مختلف مع اختلاف الاحداث وفضلت في حزن واكتئاب ورفض للحياه تقريبا وخوف من كل حاجه والامور ازدات سوء بعلاقتى بابي واخواتى لتنفيذي وصية امى بالسكن في شقتها وفعلا الدنيا ضاقت عليا اوى واسودت واحساسي بشعور انى مكروهه من كل اللى حواليا ومن اقرب الناس ليا بعد ما كنت انا المدلله من كل افراد الاسره لكونى الاخت الصغيره كنت بدعي ربنا ينور بصيرتى عايزه اخرج من اللى انا فيه ومش عارفه ازاى الامور كل يوم بتزداد سوء ونفسيتي كل يوم في الاسوء الى ان ظهرت بوستاتك واشتركت في الصفحه وتابعت مجموعه حلقات سيلفيديو أد ايه كم
المعلومات اللى كنت بنبهر بيها.. أد ايه شلت غشاوه من على عيني لنظرتى للأمور في حياتى تدريجيا بشكل مختلف.. أد ايه خففت عني صدمه موت امى وفراقها عنى وعرفت ان اللى انا فيه ده تعلق بالاشخاص وابتديت اتعامل مع الامر بيسر وصح فعلا بدعيلها، بصلي ركعتين، بقرأ قرآن ليها ، صدقه الى ان ألقاها في جنه الله بتوحشنى وبفتقدها كتيييير اوى بس عرفت ان الشيطان يعدكم الحزن ومش بديله الفرصه دى في اغلب الاوقات أد ايه نفسي اشوفك علشان اشكرك حاسه وكأن ربنا سخرك علشان اخرج من ازمتى النفسيه دى بيسر وباقتناع بنا يجازيك كل الخير يااارب ..

ثانيا : لما سمعتك بتقول ان كل واحد ليه هدف ورساله في الدنيا وان ربنا ميزه عن غيره لتحقيق الرساله دى دعيت كتييير ربنا ينور بصيرتي اعرف رسالتى ايه هى وفي ظل حالتى النفسيه السيئه اللى كانت مسيطره عليا ولما ابتديت اخرج منها كل اللى حواليا كانوا بينصحونى اشتغل علشان اشغل وقتى اكتر ومافكرش كتير علشان ابعد عن الحزن عملت جروب على النت كنت بعمل شغل هاند ميد للمناسبات واعياد الميلاد والافراح تحديدا في الفتره دى عرفت ان لازم يكون لى رساله في الكون وبرغم من شعورى بالسعاده وانا بشتغل شغل الهاند ميد للمناسبات الا انى مش حاسه ان دى رسالتى ولا ده هدفي وانى لازم ادور عليه اكتر ودعيت كتير كتير وفكرت اكتر واكتر لحد ما ظهر قدامى على النت صدفه الكوايت بوك وشد انتباهى جداا وبما انى ابنى في سن الاطفال اللى ممكن اجرب معاه الكتاب ده وفايدته وبما انى بعمل شغل هاند ميد يبقى هايكون سهل عليا انفذه وبالفعل نفذته وجربته مع ابني وانبهرت من النتيجه وساعتها قررت اتخصص في عمل الكوايت بوك للأطفال ومن يومها وانا شغاله على نفسي وبطور من افكار الانشطه جوه الكتاب وكمان طورت من شكل الكتاب وعملت تصميمات لأشكال كرتونيه بالكامل تناسب الاولاد والبنات وده اللى بيميزنى عن غيري في المجال الحمدلله حاليا صحفيين وجرايد ومجلات بيكتبوا عنى وعن مشروعي و بيستضيفونى في البرامج علشان اتكلم عن شغلى وعن اهميه الكوايت بوك للأطفال والحمدلله ياارب انى وصلت لرسالتى ولاول الطريق وبحلم انى اعلم الامهات ازاى يقدروا يعملوا لاولادهم انشطه تفاعليه من خلال برامج التليفزيون وافيد غيري وانشر العلم بشكل مختلف واكون سبب لتغير طريقه التعليم في مراحل التعليم الاساسيه علشان الاطفال يتعلموا بمنهج عالمى بيحترم عقولهم وطفولتهم. مرفق مع قصتى صوره ليا مع الكوايت